1. gr. – Heiti félagsins
Félagið heitir Ferðafélag Borgarfjarðarhéraðs, skammstafað FFB. Félagssvæðið er Borgarfjörður og nágrenni.
2. gr. – Markmið
Félagið er áhugamannafélag og er markmið þess að stuðla að gönguferðum og öðrum ferðalögum um Ísland, einkum á félagssvæðinu.
3. gr. – Skipulag
Félagið er deild í Ferðafélagi Íslands og greiðir til þess árgjald, en starfar samkvæmt eigin samþykktum og hefur sjálfstæðan fjárhag. Til breytinga á samþykktum félagsins þarf samþykki meirihluta fundarmanna á aðalfundi, enda hafi breytingartillögurnar verið kynntar í aðalfundarboði.
4. gr. – Stjórn
a) Stjórn FFB skipa 5 einstaklingar; forseti, gjaldkeri, ritari, og tveir meðstjórnendur.
b) Forseti skal kosinn sérstaklega á hverjum aðalfundi.
c) Aðrir stjórnarmenn skulu kosnir á tveggja ára fresti, 2 í hvert sinn. Þó skal kjósa 3 stjórnarmenn ef annar þeirra stjórnarmanna sem ekki hafa lokið sínu tveggja ára kjörtímabili er kosinn forseti.
d) Stjórnarmenn aðrir en forseti skipta með sér verkum.
e) Í varastjórn skal kjósa 2 menn árlega og sitja þeir stjórnarfundi og hafa atkvæðisrétt í forföllum aðalmanna.
5. gr. – Nefndir
Innan félagsins skulu starfa eftirtaldar fastanefndir:
a) Göngunefnd, sem sér um skipulagningu og framkvæmd gönguferða á vegum félagsins
b) Stikunefnd, sem sér um stikun og umsýslu gönguleiða
c) Skálanefnd, sem sér um útleigu og umsýslu gistiskála sem félagið hefur umsjón með
Auk þess getur stjórn félagsins skipað aðrar nefndir um sérstök viðfangsefni.
6. gr. – Fundir
a) Aðalfund skal halda fyrir marslok ár hvert. Þá skal stjórn félagsins leggja fram starfsskýrslu og endurskoðaða reikninga. Einnig skulu fastanefndir félagsins leggja fram skýrslu um starfsemi sína frá síðasta aðalfundi. Á aðalfundi skal einnig kjósa í stjórn og varastjórn og 2 skoðunarmenn reikninga og ákveða árgjald.
b) Aðrir félagsfundir skulu haldnir eftir þörfum. Ef 25 félagsmenn óska þess skriflega er skylt að boða til félagsfundar innan 10 daga frá því að ósk um fund kemur fram.
c) Aðalfundur og aðrir félagsfundir teljast lögmætir ef þeir eru boðaðir með að minnsta kosti viku fyrirvara í héraðs‐ og samfélagsmiðlum. Atkvæðisrétt á fundum félagsins hafa allir fullgildir meðlimir þess.
7. gr. – Slit
Verði félaginu slitið skal eignum þess ráðstafað til hliðstæðs félags innan starfssvæðisins, Ferðafélags Íslands eða annarra deilda þess, samkvæmt ákvörðun félagsfundar.
8. gr. – Annað
Að öðru leyti en hér er ákveðið gilda lög Ferðafélags Íslands.
Samþykkt á aðalfundi Ferðafélags Borgarfjarðarhéraðs þann 19. mars 2026