Helgarferð um Vatnaleiðina -AFLÝST
Þessari ferð hefur verið aflýst, því miður.
Brottför frá Mörkinni 6 kl. 8:00. Komið að Hallkelsstaðahlíð við Hlíðarvatn um kl. 10:00. Gangan hefst um kl. 10:30. Gengið upp Hellisdal, um Klifsskarð yfir í Hítardal. Ef skyggni er gott er gengið út á Rögnamúla. Gangan endar við Fjallhús Hraunhreppinga við Hítarhólm. Gist verður í skálanum. Mögulegt er að ganga að Bjarnarhelli og Foxufelli um kvöldið ef veður er gott. Rifjaðar upp sögur um Björn Hítdælakappa og af samkomum trölla og þursa í Hítardal.
Leiðin liggur meðfram Hítarhólmi eftir gönguslóðum og síðan upp Þórarinsdal. Gengið er upp úr botni Þórarinsdals og niður í Langavatnsdal við norðurenda Langavatns. Þaðan er gengið að Borg og rifjuð upp sagan örlögum síðustu ábúenda þar. Gengið út með Langavatni og gist við fjallhús Borghreppinga við Torfhvalastaði. Gist verður í fjallhúsinu þar sem verður sameiginleg máltíð.
Gengið eftir veginum upp á heiðina og síðan upp á Beilárheiðina. Gengið á Vikrafell ef útsýni er gott. Annars er gengið niður að Vikravatni og þaðan norður fyrir Vikrafell þar til komið er á gönguleiðina niður að Hreðavatni þar sem rútan bíður.
Panta þarf í þessa ferð með netpósti á ffb@ffb.is
