Kvöldganga í tilefni af 80 ára afmæli lýðveldisins
Íslenska lýðveldið var stofnað á Þingvöllum þann 17. júní 1944 og fagnar því 80 ára afmæli á árinu.
Af þessu tilefni býður FFB uppá kvöldgöngu upp með Grjótá í Hítardal að Grjótárvatni og þaðan yfir að Helgastöðum um Hettudal. Þaðan er gengið meðfram eða uppá Múlaselsmúla að rústum Múlasels og þaðan verður haldið að Grjótá og hringnum lokað. Þessi hringur er ca 13-14 km með um 400 metra hækkun svo við áætlum 4 – 5 klst. ferð.
Ekið er inn Hítardals afleggjarann og lagt rétt innan við brúna yfir Grjótá þar sem gangan hefst. Við mælum með að göngumenn hafi með sér heitt á brúsa, nesti og hlýjan fatnað.
Seinni hluta ársins verður boðið uppá fjölbreyttar ferðir, s.s. blandaða jeppa- og gönguferð, hjólaferð, hellaferð, haustlitaferð, jógaferð og aðventuferð.
Þessar ferðir verða auglýstar í viðburðum á fb og settar á heimasíðuna þegar nær dregur.
Stefnt er á að bjóða uppá ferðir á Eiríksjökul og Baulu. Þessar ferðir eru háðar veðri og ákveðnar með stuttum fyrirvara. Áhugasamir skrái sig með netpósti til ffb@ffb.is.
Fylgist með á Facebook og á heimasíðu félagsins.
Athugið: Ferðafélag Borgarfjarðarhéraðs tryggir hvorki þátttakendur í ferðum né farangur þeirra.
Þátttakendur ferðast á áfangastaði á eigin vegum og á eigin ábyrgð.
Félagið hvetur fólk til að kaupa ferða- og slysatryggingu.
